ВЕРБАС – Дзевята схадзка вербаского локалного парламенту, на хторей одборнїки розпатрали 18 точки дньового шора, отримана пияток, а зашеданє почало з вименками у составе одборнїкох Скупштини општини и у составе Општинскей ради.
Место Ґорана Пейовича, хтори задзековал на функциї члена Општинскей ради, вибрани Дамян Милович, а за одборнїка СПС-а место Миловича вибрани Неманя Вукович.
На Скупштини прилапене предкладанє одлуки о анґажованю ревизора за окончованє екстерней ревизиї закончуюцого рахунку буджету Општини Вербас за 2017. рок, одлуку о явним превозу путнїкох у драговим транспорту, и звит о роботи Явней аґенциї за зоогиґиєну и польопривреду општини Вербас за 2017. рок.
Тиж так, прилапене предкладанє ришеньох о менованю директорох комуналних подприємствох „Комуналєц” и „Стандард” и звит о запровадзених виберанкох за совити месних заєднїцох и утвердзених резултатох вибору членох совитох месних заєднїцох у општини Вербас отриманих 31. децембра 2017. року, як и предкладанє ришеня о менованю члена Општинского штабу за позарядово ситуациї Општини Вербас.
Розправяне и о Статуту Заєднїцкого комуналного подприємства „Пречисцовач Вербас – Кула”, а схадзку означели и кадрово пременки на руководзацих местох. Понеже директорка Центра за физичну културу „Драґо Йовович” Мирославка Шекарич задзековала на функциї, на тоту функцию вибрани Оґнєн Василєвич. Понеже вон бул дотерашнї директор Явней аґенциї за зоогиґиєну и польопривреду, на його место вибрани Милош Милич.
