Шейсц школяре хтори того року покладали испити на стреднїх або високих уметнїцких школох посцигли значни резултати на примацих испитох и прияти су на жадани напрями.
Владо Няради, наш визначни маляр, уж петнац роки трима годзини рисованя, правеня скулптурох и мальованя з дзецми, школярами, студентами, алє и формованима малярами, пензионерами… През його ателє потераз прешло вецей як 150 любительох подобовей уметносци возросту од штирох по 75 роки, зоз општинох Вербас, Кула, Нови Сад… Понеже причини за годзини мальованя розличити, Няради своїх школярох роздзелєл до двох ґрупох.
– У єдней ґрупи ше находза тоти хтори приходза зоз жаданьом пририхтац ше за упис до школи або на факултет и тоти годзини пририхтуєм и унапрямуєм ґу їх жаданому цилю. У другей ґрупи углавним тоти хторим подобова уметносц гоби и любов, и вони звичайно жадаю дополнїц свойо знанє и, евентуално, пополнїц буджет кед же ше занїмаю зоз применєну уметносцу – толкує Няради.
ПОЧАТНИ ГОДЗИНИ ИСТИ ЗА ШИЦКИХ
Няради наглашує же за шицких початни годзини исти, бо ше, гоч яки циль школяром, муша научиц основи и додава:
– Перши мешац ше утвердзує їх потерашня робота, установює ше гришки и намагаме ше висцерац у роботи. Потим робиме рисунок, покля ше нє усоверши, бо то основа шицкого. Аж вец ше роби композиция, малюнки, мишанє фарбох… Можебуц ше пре тото дакому нє попачи тот способ роботи, алє то єдина драга по тирваце знанє. Инсистуєм и на тим же би школяре прешли през шицки ступнї роботи: мальованє на малим и вельким формату, на отвореним и у завартим просторе, на штафелаю на платну, алє и на других подлогох. На тот способ науча препознавац добру технїку, квалитетне уметнїцке дїло, алє и одвитуюцу опрему и материял за роботу – гвари Няради.
Владо Няради школярох хтори ше жадаю уписац до даякей школи учи о скулптури, мальованю и рисованю, али и о других животних технїкох хтори барз важни за уметнїцки вираз, як цо то концентрация, самодовириє, самоконтрола…
– Зоз тим сом закончел циклус хтори твори мою кариєру. Тераз творим свойо дїла, збогацуєм ентериєр ателєа хтори сам дизайнуєм и правим, тримам колонию малярох, урамюєм свойо и други дїла, пририхтуєм платна и материяли и тримам годзини другим же би ютре вони могли формовац свой уметнїцки циклус – заключує Няради.
ВЕЛЇ ШКОЛЯРЕ ВИТВОРЕНИ ЯК УМЕТНЇКИ
През його школу потераз прешли велї школяре хтори ше уписали до жаданих школох и уж ше витворели як уметнїки, як цо то Теодора Чизмар, хтора ходзела три роки опрез примацого испиту и ище два потим як ше уписала до Стреднєй уметнїцкей школи „Боґдан Шупут” у Новим Садзе. Тераз є одлична школярка трецей класи, а на упису мала найвецей боди зоз мальованя и була перша на лїстини. Петро Медєши, школяр трецей класи истей школи, тиж бул високопласовани на упису и уж ше розпитує за упис за дальше школованє. Исту школу дзекуюци и тей школи закончели и Мая Джуня, як и Кристина Ґшвенґ хтора закончела и студиї ґрафичного дизайна у Новим Садзе.
Владо Няради видвоює и школярох як цо Мария Стела Баяи хтора три роки доставала Витезову награду у конкуренциї медзи 10 тисячи дзецинскима роботами, потим Тияну Вуйошевич хтора закончела модни дизайн у Беоґрадзе и нєшка дизайнує шмати за познату креаторку Марияну Матеус. Раде Тепавчевич тераз на штвартим року Академиї у Новим Садзе и праве достал награду за найлєпшу роботу медзи шицкима студентами, а нїч менєй значни и тоти наймладши, як цо Уґлєша Мушикич хтори од дзевец рокох указує вельки талант и дзеку за роботу и, достава награди на каждим конкурсу.
ШЕСЦЕРО НАЙУСПИШНЄЙШИ
Шицки школяре хторим Владо Няради того року помагал уписали ше до жаданих школох. Медзи нїма Мария Варґа хтора ше уписала на сценску архитектуру на ФТН- у у Новим Садзе и була на седмим месце, Ивана Вуканац, по мацери Рускиня, тиж була на седмим месце на Академиї подобовей уметносци у Новим Садзе, а Александра Новакович була штварта на истим примацим испиту. Андреа Алексич ходзела пред 10 роками на годзини, медзитим, того року, по законченю єдного факултета ришела сполнїц давне жаданє и уписала ше на напрям применєней уметносци на факултету у Беоґрадзе. Йована Боторич и Вера Боґданович успишно ше уписали до Стреднєй уметнїцкей школи у Новим Садзе.