РУСКИ КЕРЕСТУР – У рускокерестурскей парохиї св. оца Миколая пияток, 6. януара преславене Богоявлєнє по григориянским календаре, кеди пошвецена и вода з хтору такой всоботу, 7. януара, почало пошвецанє керестурских обисцох.
На Богоявлєнє Церква ше здогадує євангелскей подїї кед Йоан Хреститель на рики Йордан покресцел Исуса Христа. Богоявлєньску Вельку Службу Божу у нашей Катедралней церкви служели домашнї парох о. Михайло Малацко и капелан о. Михайло Шанта.
По Служби священїки пошвецели воду, з хтору перше пошвецели нукашньосц храму, а потим парохиянє швецену воду однєсли дому.
Всоботу пошвецени обисца на улїци Маршала Тита (на Вельким шоре), а од нєшка почало пошвецанє часци валалу од Крущичу, перше обисцох на Новим шоре.
Од штвартку, 12. януара, з пошвецаньом обисцох на Фрушкогорскей улїци (Маковски шор) почнє пошвецанє и часци валала од Косанчичу.
