Утвердзена програма и провадзаци манифестациї Националного швета

автор маф
807 Опатрене

РУСКИ КЕРЕСТУР – На вчерайшей 5. схадзки Орґанизацийного одбору преслави Националного швета Руснацох утвердзена конєчна програма хтора будзе у Руским Керестуре, 19. януара идуцого року, а будзе у духу означованя 100-рочнїци од снованя Руского народного просвитного дружтва (РНПД) одн. Просвити – виявела за Рутенпрес предсидателька Одбору Олена Планчак Сакач.

По єй словох, концепция Националного швета будзе як и потерашнїх рокох, почина зоз служеньом Болагодарней Служби Божу у церкви на 17 годзин. На 18,30 г. у виронаучней сали будзе вистава – портрети наших паноцох, а буду виложени и малюнки з мотивами Керестура хтори ту настали на Подобових колонийох „Няради”.

Етно-столи буду поставени на 19,30 г., понеже на 20 годзин почина Централна преслава у Велькей сали Дому култури, а коктел плановани у Ресторану „Червена ружа” на 22 годзин.

– Централна програму ше конципує так же би нє була длугша од годзини и пол. Вона будзе преткана зоз рочнїцу снованя РНПД-а, та помедзи музични часци буду и часци ґлуми, о найважнєйших акцентох тей историйней подїї, як РНПД основане, хто ше за тото заложел, и як вибрани руски язик хтори и нєшка бешедуєме, и на нїм зме основали цалу нашу културу и традицию — заключела Планчак Сакачова.

Як и потераз, главни орґанизатор Националного швета Завод за културу войводянских Руснацох, а вєдно з домашнїм Домом култури Руски Керестур.

ПОВЯЗАНИ ТЕКСТИ