Наша вира до воскреснутого Исуса то найвекши скарб котри ма кажди чловек, окреме християн, бо Исусово Воскресенє – то фундамент и основа християнства. Буц християн – значи вериц же Исус, котри бул розопяти, воскреснул з мертвих и зоз своїм воскресеньом превладал шмерц, а нам, котри вериме, отворел уход до живота вичного.
Же бизме зачували тот наш християнски идентитет, положме до штредзиска свойого живота праве виру до Воскреснутого, бо славяци Христово Воскресенє, виражуєме виру и надїю и до нашого власного особного воскресеня. То вира побиди вичного живота над шмерцу крижа, вира побиди шветла над цмоту, любови над нєнависцу, побида радосци над смутком. З того виходзи же наша каждодньовосц, нашо болї и церпеня – то нє законченє, алє преход до радосци. Радуйме ше же наш живот достал нови обсяг и смисел праве у Исусовим живоце, у Його шмерци и воскресеню, радосц – то фундаменталне опредзелєнє християнского жица!
Кед би Исус нє воскреснул, швет би пребувал у хаосу. Ми вериме же Дух Исуса Христа може стаємно меняц швет и пременює го, а праве ми маме буц тоти од котрих завиши чи Воскресенє пременї швет, чи ше пременка вообще случи найперше у нас и пременї нашо животи. Кед ше присподобиме ґу швету, його трендом и идеалом, його думаню и дїлованю, кед Бог нє завежнє у нашим живоце тото место котре му припада, вец и швет нє прилапи анї християнство, анї нас.
Кед постанєме Исусов квас и будземе глєдац лєм Його славу, а нє свою, кед будземе сотруднїки Исусового дїла котре Вон жада прейґ Церкви витвориц у сучасним чаше, теди наисце допринєшеме же ше Воскресенє случи и нєшка, а Його моц ше виражи у нас и коло нас.
Будзме шветло Воскресеня, най воно ошвицує драгу каждому, подзельме го з другима: най ше швици у наших очох, на наших лїцох и у наших ошмихох, най одгукує у наших словох и указує у наших дїлох любови; теди нашо шведоченя буду моцни одгук того цо за нас Бог зробел!
Радуйме ше и вешельме ше у тих благословених дньох Воскресеня Христового, бо нам любов Божа, прейґ власней жертви, отворела райски дзвери през котри можеме прейсц нашлїдзуюци Воскреснутого Спасителя.
Винчуєм щешлїви швета! Най буду благословени и охабя у нас и у швеце нєвисцерююци печац нашого дожица Воскресеня Христового!
Христос Воскрес!
Воистину Воскрес!
Ваш Владика
+ Георгий