ВЕРБАС – У рамикох проєкту „Нащиви институцийох и державох-членїцох Европскей униї”, хтори за републични и локални орґани власци, цивилни сектор и медиї, орґанизує Делеґация ЕУ у Сербиї, того тижня Централни пречисцовач за преробок одрутних водох Вербас – Кула нащивела студийска ґрупа хтору творели представителє тих орґанох и часцох дружтва.
Пошоренє у Вербаше вибране як приклад проєкту хтори у Сербиї запровадзує делеґация ЕУ и пре важносц проєктох у обласци енерґетскей ефикасносци. Госцох на пошореню дочекали предсидатель Општини Вербас Милан Ґлушац и директор подприємства „Пречисцовач Вербас – Кула” Ранко Митрович.
Як з тей нагоди визначел Ґлушац, Општина порихтана вислухац кажде предкладанє або суґестию хтора може унапредзиц ефикасносц у самей реализациї проєкту або у роботи самого пошореня.