РУСКИ КЕРЕСТУР – Вчера отримани Рочни концерт секцийох Дому култури Руски Керестур на хторим ше численей публики представели музични и танєчни секциї рижних ґенерацийох, од старших дзецинских ґрупох, та по ветеранох.
Концерт отворел Мишани хор, под дириґентску палїчку Лидиї Пашовей, а потим участвовали Хлопска ґрупа, Женска, та Дзивоцка шпивацка ґрупа Дому култури. Зоз соло-точками ше представели Янко Мудри, зоз шпиванку „Грайце гудаци“, Иван Надь зоз „Гунцути Руснаци“ и Мирослав Малацко зоз „Червену курочку“ и „Чарни очка моєй милей“, док дует Андреа Бучко и Весна Надь виведол три композициї.
И попри велького дижджу, вчерайши концерт бул барз добре нащивени, а публика найлєпше реаґовала на танєчну часц. Найвекше одушевиє виволали ветеранє з виводзеньом танцу „Вербунґу на Горнїци“, хореоґрафки Ґабриєли Саянкович. Окрем ветеранох, з новима хореоґрафиями наступели и старша дзецинска фолклорна ґрупа, та Виводзацка ґрупа, хтора єден танєц виведла и у новим облєчиве.
Шицких виводзачох провадзел Вельки народни оркестер Дому култури, а програму Рочного концерту пририхтали Лидия Пашо, Юлиян Рамач Чамо и Ґабриєла Саянкович. Конферансу написал Михайло Бодянец, а програму водзел Себастиян Надь.
