НОВИ САД – Делеґация представнїкох рускей заєднїци зоз Мадярскей, прешлого тижня пребувала даскельо днї у Войводини, на свойофайтовей екскурзиї пообиходзели знаменїтосци у вецей местох, алє и Филозофски факултет у Новим Садзе, як и Завод за културу войводянских Руснацох. Планую присц ознова, та наявели нащиву и до наших руских валалох
Нащивела Филозофски факултет и Завод за културу войводянских Руснацох, у Новим Садзе, а павзу за оддих направели на Петроварадинскей твердинї. Попри тим, понеже були змесцени на Паличу, нащивели културни и вирски знаменїтосци и у Суботици, Сенти и Чантавиру.
У Семинаре за славистику Филозофского факултета госцох привитала библиотекарка Нада Усанович Ашаня котра и пририхтала кнїжки у котрих дотхнути мадярско-руски науково контакти, a професор Капраль до семинарскей библиотеки подаровал прикладнїк своєй кнїжки „Карпаторусински населєня”.
Госцом зоз мадярскей домашнї бул проф. др Михайло Фейса, предсидатель Рускей матки и КПД ДОК, котри визначел же на тим стретнуцу направени нови плани и же буду пририхтовац кнїжку о руских презвискох котри вязани за обласци у Мадярскей.
У Заводзе за културу войводянских Руснацох модератор розгварки бул проф. др Михайло Фейса на руским язику, а розгварка симултано прекладана на мадярски язик же би шицки могли активно участвовац. З тей нагоди фокус бул на новому представительови Русинох у Мадярскей Викторови Крамаренкови.
Крамаренко визначел же ше Русини Мадярскей цеша же маю комплетну кодификацийну литературу – од Правописа русинского язика, прейґ Збирки правилох русинского писаня и Русинско-мадярского словнїка, по Русински правописни словнїк зоз ґраматичнима таблїчками. Наглашел и же Русини Мадярскей, вєдно зоз мадярским народом и другима националносцами, будую заєднїцку будучносц.
У розгварки участвовала и мр Гелена Медєши хтора подаровала госцом даскельо публикациї Дружтва за руски язик, литературу и културу. Присутним орґанизатор орґанизовал и културно-уметнїцку часц у хторей участвовал домашнї Йован Дарков Бєлица и госцински Ана и Мария Бан. Бешедоване и о сотруднїцтве на других уровньох русинскей култури.
