Достали два награди – найлєпши у аґробизнису

автор м. тамаш
400 Опатрене

Наградa за найлєпши ИТ досяги у аґробизнису – ВИВА СМ компютер и наградa за Информатични досяги у аґробизнису за ВИВА СМ компютер.

Компания BEST & CO INTERNATIONAL GROUP з Вербасу, чий власнїк Силвестер Полдруги, на нєдавно законченим 89. Медзинародним польопривредним саймe у Новим Садзе достала два Златни медалї за иновативну опрему. У ґрупи Найлєпши у аґробизнису  достал награду за найлєпши ИТ досяги у аґробизнису – ВИВА СМ компютер и награду за Информатични досяги у аґробизнису за ВИВА СМ компютер.

Силвестер Полдруги  Компанию БЕСТ основал 1985. року у Вербаше, дзе на  1000 m² завартoгo простору и 4000 m² отвореного простору предава польопривредни машини и опрему. Од моменту  наставаня тей компаниї по нєшка, гвари Полдруги, основна идея уводзенє нових машинох и технолоґийох до польопривредней продукциї.

– На Польопривредним сайме у Новим Садзе викладаме уж вецей як трицец роки. Того року зме виложели коло 150 машини, по прикладнїк з каждей ґрупи, бо нє мож шицко принєсц, на вецей як тисяч квадратни метери и участвованє на сайме нашу компанию кошта коло 35 тисячи еври. Людзе ше заждали сайму – гутори Полдруги и додава же, цо ше його компаниї дотика, предаванє машинох ишло слабше як ше обчековало.

– Вельки проблем же Министерство польопривреди того року нє дало субвенциї за польопривредни машини и же Покраїнски секретарият за польопривреду позно обявел резултати конкурсох за субвенциї за польопривредни машини, уж кед прешол саям, та людзе нє знали чи можу себе вибрац машину, чи нє. Предходних рокох резултати конкурсох ше знало скорей початку сайму, так же ше знало хто достал субвенциї и чи може куповац. Людзе чекаю помоц, вельо им значи  кед од держави достаню помоц, окреме же того року була барз драга ярня шатва, цени минералних гнойох барз пошли горе, драги хемийни средства… Даєдни польопривредни продукти достали цену, алє мало хто зоз своїм зарном дочекал тоту вельку цену, шицки жито, слунечнїк, сою, а даєдни и кукурицу предали влонї, як зняли з поля, бо кажде мал трошки и то требало реґуловац – гутори Полдруги и додава же заш лєм шицки чекаме же будзе лєпше, же єст оптимизму и прето и були на тогорочним Польопривредним сайму.

ДЛУЖЕЙ ШЕ ЧЕКА НА ВИПОРУЧОВАНЄ МАШИНОХ

Темпо обезпечованя польопривредних машинох од кеди криза у економиї и сировинох у швеце, санкциї и война у України ше барз пременєл, на випоручованє машинох ше длуго чека.

– Тота система випоручованя машинох яку зме мали скорей, дзе було досц лєм на час машину виплациц, звалєна по домино ефекту. Нашо добавяче з иножемства, продукователє польопривредних машинох, нє можу нам випоручиц машини, каждей хиби даєдна часц. Ми робиме шприцли зоз Аґромеханїку зоз Краню, ми им нашо потреби дали у новембру прешлого року, бо ше то так роби, а тераз зме достали лєм 18 одсто того цо зме наручели. Хибя им даяки часци и нє можу нам випоручиц глєдани машини, а так и з другима. Термини за випоручованє ше барз предлужели. Цо ми вредзи кед машину за шатву достанєм позно, страци ше цали рок єй хаснованя – гутори Полдруги и додава же ше скорей резервни часци доставало за мешац-два после поручованя. На приклад, од добавячох з Италиї тераз рок випоручованя 11 мешаци. Чом ше то так роби и чи справди нєт сировини у швеце? А кажде купує машину теди кед му треба, дармо ю будзеце мац после, кед прейдзе тота сезона, бо мушице другому заплациц най вам тераз зроби цо треба и правице векши трошки, а могли сце то зробиц зоз свою машину.

КОМПЮТЕРИ У ПОЛЬОПРИВРЕДИ

Компания БЕСТ у остатнїх двох-трох рокох почала продуковац компютери за польопривредни машини, за цо достали и два награди на тогорочним Польопривредним сайме.

– Я 80-их рокох робел електронїку за нємецку фирму РАУ, хтору 1985. року купели Данци и застановели тоту обласц и я вец нє мал за кого робиц. Думал сом же ми то нє будзе требац и вошол сом до предаваня польопривредних машинох и тераз, як була корона, и як и ми нє мали цо робиц, почал сом то ознова робиц. Направели зме феноменалну машину, а тот наш компютер хтори ми воламе „штири у єден” цошка цалком нове. З електронїки у Сербиї нїхто подобне нє понукнул. Кед войдзеш до трактора вон затрепани з комютерами, за кажду приключну машину єст други. Мой компютер роби зоз вецей приключнима машинами и то зоз: машину за розсипованє минералного гною, шприцлу, двома шеячками – пнеуматичну шеячку за кукурицу и шеячку за жито, динамичну мажу и опцийно є ище и навиґацийна система – GPS, GLONASSМ– русийска Ґлобална навиґацийна сателитна система, ISOBUS – стандардизована комуникация медзи трактором и приключнима машинами хтора подрозумює подполну компатибилносц, контрола наводзеня напряму и ефикасне рушанє по полю. Барз зме задовольни же нашу роботу як добру и хасновиту оценєла Комисия Польопривредного сайму у чиїм составе нашо найвекши фаховци за електронїку – гутори Силвестер Полдруги. 

РЕЗУЛТАТ ТИМСКЕЙ РОБОТИ

ВИВА СМ компютер резултат тимскей роботи.

– Мотив же бизме рушели до находзеня лєпшого ришеня за роботу польопривредних машинох то же машини хтори нам з увозу сциговали 2019. року приходзели з електронїку за хтору зме похопели же є нє добра. Я гварим, людзе мойо, я тото робел дакеди, так же у октобру того року будзе два роки як зме започали з тоту роботу, то длуги процес, треба часу же би ше шицко  конструовало. Єст нас даскельо у тим тиму… Гварел сом им – нє гуторце ми же нє мож, кед я дам даяку идею ви поведзце – треба нам часу, а нє же нє мож, и так було и тераз… Значну роботу за наградзени ВИВА СМ компютер зробел електроинженєр Михайло Войводич. Вон закончел електро напрям на Войней академиї, бул у Русиї два роки на специялизациї, його специялносц рижни GPS системи. Робел дакеди за вельки системи и уж вецей роки є у пензиї. Вєдно робиме. Я знал цо треба, а вон як то мож направиц… – толкує Полдруги и додава же у Сербиї нє могол купиц шкатулу за змесценє софтверских часцох за тот нови компютер, та з Нємецкей увезол машину ЦНЦ, зоз хтору то ту направел. Даєдни часци увежени аж з Австралиї.

– Док сом позберал добавячох у швеце, од того береш чип, од другого инше прешло часу, алє зме шицко составели и витестирали  прешлого року. Концом авґуста того року починаме предавац. Нам як тарґовище за нашу машину интересантни и продукователє звонка Сербиї, уж даєдни з тих од хторих купуєм польопривредни машини заинтересовани положиц тот софтвер до своїх машинох – гутори Силвестер Полдруги и у франти додава же „маме идеї, алє зме уж стари”, алє на щесце у Компаниї Бест, хтора ма  28 занятих, робя и млади людзе и младши члени фамелиї Полдруги, та єст хто предлужи традицию успишней роботи.

ПОВЯЗАНИ ТЕКСТИ