РУСКИ КЕРЕСТУР – Вирни парохиї св. оца Миколая у Руским Керестуре, вчера на богослуженьох означели швето Собор Архангела Михаила – Михала.
У катедралней церкви Служби Божо були на 8 и 17 годзин, а велька Служба була лєм у Марийовим святилїщу Водици. Служел ю капелан о. Владимир Медєши, а парох о. Михайло Малацко споведал. У казанї о. Медєши потолковал швет безтїлесних силох, а визначел же Миха-ел значи – подобни як Бог, прецо ше и людзе хтори створени на подобу Божу маю намагац цо частейше мац тоту прикмету.
У Водици и попри жимней и молговней хвилї, було надосц вирних, а Служба отримана у лєтнєй каплїци и була остатня того року у тим нашим святилїщу.