Комунална солидарносц на дїлу

автор апм
1.3k Опатрене

Вербаску акцию порушала локална самоуправа, а потримали ю гражданє. Єст ище значнєйши инициятиви хтори порушую гражданє, а препознава держава.

Акцию „Здружме роботу за город Вербас” хтора отримана соботу, 28. мая, иницировало Явне комуналне подприємство „Комуналєц”, а потримали ю велї явни подприємства, установи, нєвладово орґанизациї, привредни субєкти. Вкупно ше одволали скоро 30 орґанизациї рижного типа, а тижнями пред тим апеловане и на гражданох же би ше уключели до акциї пораєня городу.

Цала иконоґрафия – од паролох, плакатох и леткох хтори ше по городзе дзелєло пред тим, та по музику на главней площи тей соботи (медзи иншим и „Ой, Козаро” и подобни писнї) шицко здабало на гевти часи кед Младежски роботни акциї (ОРА) були у полним розмаху, а акцияше полни ентузиязму. Випатра же символика наисце уплївовала на становиска людзох, та дух дакедишнїх югославянских вельких роботних акцийох „таргнул” город и уключели ше велї Вербащанє.

Орем дзивих депонийох коло городу и населєних местох, циль було ушориц и други запущени локациї, а попри Комуналного подприємства, механїзацию обезпечели вельки компаниї з Вербасу.

Директор „Комуналца” Радомир Чурович визначел же то була найвекша роботна акция ушореня Општини у остатнїх 30-40 рокох.

– Презадовольни зме кельо ше людзе одволали, а досц повесц и же попри шицких роботно способних, участвовали и особи з инвалидитетом. Приоритет нам були локациї у Вербаше, алє у шицких населєних местох маме дзиви депониї хтори ше нє пораєло роками. Тиж так, гражданє хтори нєшка опрез своїх обисцох винєсли одпад, могли ше го ришиц. Окрем того, акция ма ище єдно  конкретне значенє, понеже средства хтори були наменєни за санированє дзивих депонийох вецеймилионски. По законченю акциї будзе ше розпатрац найлєпши способ як город може уложиц тот зашпоровани пенєж – визначел Чурович и додал же план же би тота акция постала традицийна, же би ше кажди рок отринмовала у маю.

По його словох, нїч нє було „на силу”, алє ше учашнїки одволали добродзечнє. Цо ше дотика самого „Комуналцу”, всоботу на роботних локацийох були шицки заняти, и гевти зоз администрациї, хтори мали нагоду, як гвари Чурович, видзиц у яких условийох робя їх колеґове на терену.

DSCF0164

ВЕЛЬКА ЕНЕРҐИЯ У ЗАЄДНЇЦКИМ ИНТЕРЕСУ

На окремни способ до акциї ше уключел и Дом здравя „Велько Влахович”, заняти у Полицийней станїци Вербас, ЯПВ „Води Войводини”, АД „Медела”, ПП „Сава Ковачевич”, зоз Явней аґенциї за зоогиґиєну и польопривреду, заняти у Културним центре Вербас, Центру за физичну културу, Общим шпиталю Вербас и других установох, а ошвиженє за волонтерох обезпечели менши привреднїки.

Без огляду же ше до того проєкта навелько одволали установи и институциї, поволанка, насампрез, була унапрямена гражданом. Тоти цо участвовали, мали нагоду з першей руки видзиц и здобуц упечаток  у яким стану наисце нашо околїско. И помогнуц же би ше стан голєм кельо – тельо злєпшал. Велїм то можебуц була  школа за „будзенє” комуналней одвичательносци и еколоґийней свидомосци…

Свойо вельке доприношенє дала и нєвладова орґанизация Еколоґийни рух Вербас, орґанизация хтора роками зазберує младих коло темох и акцийох очуваня животного штредку. По податкох тей орґанизациї, назберани дзешатки камиони шмеца и за єден дзень умило ше  твар городу.

– Зоз тоту активносцу зме указали же зме нє шицки исти, же нє забрудзую шицки, алє по количестве одпаду хтори зме назберали – видно же забрудзую тисячи наших согражданох. Алє, указало ше же з малима напруженями мож порушац вельку енерґию у заєднїцким интересу – визначел предсидатель Еколоґийного руху Ратко Дюрдєвац.

Даскельо днї пред тим, даєдни од порядних учашнїкох роботних акцийох у бувшей Югославиї на централней площи у Вербаше, поволали гражданох же би ше уключели до акциї, та медзи нїма члени СУБНОР-у, хтори дзелєли летки и визначели же су и у тих рокох вше за роботни акциї. Окрем того, самоинициятивно ше придружели и представителє новоснованого Дружтва инвалидох Вербасу.

На дзень самей акциї, бул  и визначни дакедишнї акцияш Йосиф Кужич.

– Стари сом акцияш, мам 62 роки и штири роботни акциї за собу. Єдна з нїх була 1972. року на гайзибанскей драги Ябука, Беоґрад – Бар, вец твердиня у Нишу и корито рики Нишави 1976. року, 1977. сом бул у Краґуєвцу, рика Лепеница, и на концу у Сараєве. Окрем роботи, на акцийох було и спорту, културни активносци, друженя, любови, а резултат тедишнїх акцийох и дзепоєдни нєшкайши малженства. Тот час прешол, алє думам же би и нєшка требало буц вецей таки акциї, дзе ше перше розчисци критични и запущени локациї, а потим  оплеменї и розвиє околїско – визначел Кужич.

12285748_965015963558858_1623830965_n

ИНИЦИЯТИВА З БАЗИ

Ораховчанє уж роками указую високи ступень еколоґийней свидомосци и солидарносц, а проєкт „Ожелєньованє Нового Орахова” постава уж традицийна активносц жительох того места, понеже того року будзе пияти рок садзеня древкох. У рамикох тей акциї потераз посадзени вецей як 4 000 древка. Орґанизатор Акциї еколоґийни рух „Еко Ґерила”, а гоч є нє директно вязани за руску заєднїцу, Национални совит (НС) Руснацох – перше прейґ Одбору за младеж и спорт, а тераз прейґ Роботного цела за младеж – од початку поряднє софинансує тоту активносц. У акциї участвую шицки заинтересовани Ораховчанє, а зоз тоту акцию ше жада дац нагоду младим же би през роботу и дружєнє допринєсли штредку у хторим жию. Єден зоз иницияторох акциї „Ожелєньованє Нового Орахова” бул Александар Бесерменї, котри теди бул член Одбору за младеж и спорт НС, а тераз ствари кончи його младши брат, Борис Бесерменї.

– „Еко ґерилу” найвецей „ґураю” млади, а до акцийох ше уключую углавним людзе з Орахова и з Тополї. Просеково по акциї маме 25 – 30 волонтерох, цо нам цалком досц. Думам же наш рух, вшелїяк, уплївовал на еколоґийну свидомосц валалчанох, а до рока посадзиме од 800 по тисяч древка – визначел Борис Бесерменї.

И акция Новоораховчаньох, и вецей стотки Вербащанох хтори соботу вишли вонка и викасали рукави, приклад же як ше през подобни инициятиви гражданє и держава можу позберац коло заєднїцкого циля, а то на концу и сущносц орґанизованого людского дружтва.

ПОВЯЗАНИ ТЕКСТИ