НОВИ САД – Новинско-видавательну установу Руске слово у Новим Садзе, вовторок, 11. авґуста нащивели представнїки Оддзелєня за медиї мисиї ОЕБС-а у Републики Сербиї.
Оддзелєнє за медиї мисиї ОЕБС-а у Републики Сербиї представели шеф Доминик Тиєри, Саня Станкович и Светлана Янкетич, а привитал их директор НВУ Руске слово др Борис Варґа. Отримана роботна схадзка, на хторей ше представнїки Оддзелєня за медиї мисиї ОЕБС у Републики Сербиї упознали з роботу НВУ Руске слово, професийнима и етичнима стандардами, хтори тота установа запровадзує шейсц роки.
По словох директора НВУ Руске слово др Бориса Варґи, констатоване же запровадзованє етичних и професийних стандардох нє вше ишло лєгко, алє по лєто 2026. року НВУ Руске слово и Национални совит Руснацох углавним почитовали Интерни етични медийни кодекс, хтори подписали 2019. року.
Тиж, представнїком Оддзелєня за медиї мисиї ОЕБС указана и вистава: История Руского слова през заглавя, насловни боки и лоґои виданьох Вик як клїпнуце, хтору Установа орґанизовала з нагоди трох рочнїцох – 20-рочнїци Рутенпресу, 80-рочнїци НВУ Руске слово и 100-рочнїци друкованого новинарства по руски.
