НОВИ САД – У Новим Садзе вчера отримана конститутивна схадзка Скупштини АП Войводини у новим зволаню, на хторей приусуствовали 119 з вєдно 120 покраїнских посланїкох.
За предсидателя Скупштини Войводини знова вибрани Иштван Пастор зоз Союзу войводянских Мадярох (СВМ), а як пише Танюґ, за його вибор на тоту функцию гласал 91 посланїк – зоз Сербскей напредней странки (СНС), Социялистичней партиї Сербиї (СПС), СВМ и Сербскей радикалней странки (СРС). Процив були посланїки Демократскей странки (ДС), два посланїки з Руху „Досц було” (ДБ) и Мадярского руху за автономию, а стримани були посланїки з Лиґи социялдемократох Войводини (ЛСВ) и пейц посланїки Руху „Досц було”.
За подпредсидательох Скупштини Войводини вчера вибрани Мирослав Васин (ДС), Дамир Зобеница (СНС), Смиляна Ґламочанин Варґа (СРС), Душан Яковлєв (ЛСВ), Снежана Седлар (СНС), Александар Дянкович (СПС) и Иван Стиєпович (ДБ). За ґенералного секретара Скупштини меновани Никола Баняц (СНС).
У новим зволаню Скупштини АПВ СНС ма 63 мандати, коалиция коло СПС 12, СРС и коалиция коло ДС по 10 мандати, ЛСВ 9, Рух ДБ ма 7, СВМ 6, два мандати ма Колаиция Мадярски рух за автономию, а Желєна странка єден мандат.
Предсидатель Скупштини АПВ Иштван Пастор вчера виявел же шлїдуюца схадзка парламенту найвироятнєйше будзе отримана о 10 днї, а главна точка на нєй будзе формованє Покраїнскей влади.
На новинарски питаня же хто будзе участвовац у формованю новей Покраїнскей влади, Пастор одвитовал же сиґурне же то буду СНС и СВМ, а як гварел, нє нєсподзивало би го кед то будзе и СПС.
– СВМ поволана на розгварки о формованю Покраїнскей влади, а шицко друге завиши од СНС, понеже вона прешвечлїво освоєла найвецей мандати и одлучує о тим же з ким будзе бешедовац – гварел Пастор и додал же нє ма нїч процив преширйованя списку странкох з хторима ше будзе бешедовац о Покраїнскей влади.