Милан Шолая достал и число Гуманитарней фондациї „Будз гумани – Александар Шапич”

автор ол. русковски
446 Опатрене

КОЦУР/ВЕРБАС – Прешлого тижня у Коцуре и Вербаше порушани числени гуманитарни акциї за Милана Шолаю зоз Коцура, котри ше зочел зоз дияґнозу озбильней хороти и котрому нєобходна операция котра би мала буц окончена початком мая.

Орґанизовани гуманитарни акциї, гуманитарни лицитациї, оформена Фейсбук ґрупа За Шолая Милана, одволали ше числени спортисти, уметнїки, людзе котри жадаю помогнуц на рижни спососби.

До збераня пенєжу за Миланово лїченє улючели ше и велї орґанизациї, та так и Гуманитарна фондация „Будз гумани – Александар Шапич” котра дала Миланови число прейґ котрого достава добродзечни прилоги. Пенєж мож уплациц прейґ СМС порученя у хторим треба написац 1013 и послац на число 3030 (цена порученя 200 динари), лєбо на динарски рахунок 160-6000000856719-04, и девизни 160600000085727679.

Тиж, отворени и жиро-рахунок на котри людзе добрей дзеки можу донирац пенеж: ERSTE BANK 340-87053231-30.

Най здогаднєме, Милан дакеди бул успишни рукометаш, а нєшка параолимпиєц, котри перши у Европи и други на швеце у статичней апнеи за особи зоз инвалидидтетом. На контролним препатрунку 12. априла дияґностиковани му тумор на похребцини, котри залапел два похребциново персценї и онєможлївене му и шедзенє. Тумор би цо скорей требало одстранїц зоз похребцини, сообщели дохторе, прето же Милана животно загрожує. Шолайови нєобходна операция, же би му уложели два штучни похребциново персценї и фиксатор похребцини.

На сайту Гуманитарней фондациї обявене же Миланово лїченє, котре облапя операцию, регабилитацию, специялистични и контролни препатрунки, ортопедски помагала и драгово трошки, вимага 3 263 502 динари. Понеже Милан нє у можлївосци финансовац то сам, замодлєл шицких гуманих людзох же би му помогли у тей борби.

ПОВЯЗАНИ ТЕКСТИ