РУСКИ КЕРЕСТУР – Здруженє за Ментално нєдостаточно розвити особи (МНРО) Белава птица зоз Кули, вчера у Велькей сали Дома култури виведли музично-драмску представу Успани красавец за хтору текст и режию поробела Єлена Фачол.
Представа Успани красавец, у хторей ґлумели дзеци, алє и одроснути зоз Здруженя Белава птица, вєдно зоз своїма виховательками, приказала обробки найпознатших дзецинских баснох, злучених до єдней, а през музику, танєц и сучасни и комични диялоґи.
Задовольна публика учашнїкох у представи наградзела зоз моцним аплаузом, а як за Рутенпрес виявела вихователька Єлена Фачол, таки способ виражованя вельо уплївує на самодовириє и спознайни функциї їх хасновательох, понеже вони през бависко збогацую словнїк, ошлєбодзую ше од стресу и напартосци, а окреме им значи повага и потримовка других людзох.
