РУСКИ КЕРЕСТУР − На Централней преслави Националного швета Руснацох, котре отримане вчера 19. януара у Руским Керестуре, присуствовали визначни госци, як домашнї, так и з иножемства, представнїки церкви, републичней и покраїнскей власци, локалней самоуправи и дипломатского кору.
Медзи визначнима госцами привитани предсидатель Националного совиту рускей националней меншини (НСРНМ) Борислав Сакач, владика кир Георгий Джуджар, народна посланїца Олена Папуґа, амбасадор України у Сербиї Олександер Александрович, представнїк амбасади Русийскей федерациї Алексей Жуков, представнїк ґенералного конзулату Горватскей Хрвоє Вукович, покраїнски секретар за културу, явне информованє и одношеня з вирскима заєднїцами Драґана Милошевич, помоцнїца покраїнского секретара Милинка Хрчан, помоцнїк покраїнского секретара за туризем и реґионалне сотруднїцтво Серґей Тамаш и предсидатель Дочасового орґану општини Кула Велибор Миолоїчич.
На Шветочней академиї привитана и директорка Заводу за културу войводянских Руснацох (ЗКВР) Анамария Ранкович, предсидатель Управного одбору ЗКВР Миломир Шайтош, члени НСРНМ, делеґациї Руснацох зоз Горватскей, Мадярскей и Словацкей, як и Петро Сокол, одборнїка у Прешовским самоуравним краю.
Предсидатель Националного совиту рускей националней меншини, Борислав Сакач, привитал присутних зоз шлїдуюцима словами.
− З тей нагоди, указуєме же зме уж три вики присутни на тих просторох и же маме можлївосц указац же нашо коренї глїбоко, же ше нашо конари уж розконарели и же зме ше глїбоко попреплєтали зоз шицкима котри жию у Войводини − гварел Сакач, а закончел зоз констатацию же лєм кед ше будземе тримац вєдно, та будземе присутни на тих просторох ище три вики, и предлужиме тото цо робели нашо предки.
Владика кир Георгий Джуджар у своєй винчованки ше огляднул на 100-рочнїцу од снованя РНПД котре положело моцни фндаменти до културного и националного розвою.
– Позберали зме ше ту же бизме пошведочели же зме остали, обстали, и же зме ше розвили и на тот способ потвердзели и предлужели тото цо розпочате пред 100 роками. Дзекуюци схопносци и мудросци предстванїкох нашого народу, наших предкох хтори зрозумели одвитуюци моменти историї и вихасновали их на нашо добро.
Нагоду повинчвац швето достал и українски амбасадор у Сербиї, Олександер Александрович, а винчуюци Швето винчовал и снованє нового Националного совиту Руснацох и доставанє своєй епархиї, бо то оможлївює дальши духовни и културни розвой нашей заєднїци и других заєднїцох котри жию у Войводини.
Предсидатель Дочасового орґану Општини Кула, Велибор Милоїчич, тиж повинчовал швето, и то на руским язику, а здогаднул присутних же општина Кула препознатлїва по складним соживоце. Попри тим, обецал же Општина Кула и убудуце предлужи потримовац шицки манифестациї котри означую руску заєднїцу.
З окремним виражованьом задовольства, же єй дата чесц привитац шицких и повинчовац Националне швето, предлужела Драґана Милошевич, покраїнски секретар за културу, явне информованє и одношеня з вирскима заєднїцами.
− Од присельованя Руснацох прешло вецей як два и поли вики, а за тот час през нашу ровнїну пребегли велї историйни мена, медзитим Руснаци и далєй ту, як свойофайтова константа, и єдна од найлєпших ниянсох националносцох у розкошним спектру националних розличносцох Войводини. Щиро сом щешлїва же то нєшка так, и цалком сом сиґурна же так будзе и през роки котри пред нами.
Милошевичова предлужела зоз толкованьом способу потримовки єй Секретарияту и Покраїнскей влади рускей заєднїци, а медзи иншим, спомла порядне финансованє ЗКВР, кровней културней институциї. Ґу тому, од окремного значеня и НВУ „Руске слово” и руски редакциї РТВ Войводини и Радио Нового Саду котри покраїнска власц потримує, и за шицко обецала максималну потримовку и надалєй.
Присутним у публики пречитана и часц винчованки котру у писаней форми послал покраїнски секретар управу, предписаня и национални меншини-национални заєднїци Михаль Нїлаш а у котрей медзи иншим пише шлїдуюце.
− Скупштина АП Войводини принєсла одлуку же би ше тот дзень видвоєло як дзень од окремней значносци за руску националну меншину, а зоз тим и за АП Войводину у цалосци. А то лєм потвердзує окремне почитованє и озбильносц политики котру водзи покраїнска Влада.
Вецей фотоґрафиї мож поопатрац у нашей фотоґалериї.