На соботу Саям творчосци валалских женох з Войводини

автор сен
1.1k Опатрене

ЗРЕНЯНИН – З нагоди 15. октобра, Медзинародного дня валалских женох, у Зренянину будзе отримани тогорочни Саям творчосци валалских женох – вистава автентичних ручних роботох женох з войводянских валалох. Саям будзе мац штири тематични цалосци – тканє и ручни роботи, стародавни и традицийни колачи, сувенири и орґанска пожива.

З Манифестацию ше жада представиц творчи потенциял валалских женох, продукти старих ремеслох хтори пестую и чуваю традицию, и богати културни скарб войводянского мултинационалного амбиєнту.

Медзинародни дзень валалских женох запровадзени 2007. року пре обрацанє уваги на ключну улогу женох на валалє, а манифестацию на чесц валалских женох ше отримує од 2009. року. Дотераз домашнї були Нови Сад, Зомбор, Индїя, Суботица, Кикинда, Апатин и Бачка Паланка.

– Важне повесц же на Саям вше приду коло 2 000 жени, котри орґанизовани до скоро 200 здруженьох зоз 37 локалних самоуправох – гварела директорка Заводу за ровноправносц полох Диана Милович и визначела же акцент Манифестациї унапредзованє економского, привредного и туристичного потенциялу Войводини.

Програму тогорочного Сайму творчосци валалских женох на конференциї за новинарох у Покраїнскей влади 10. октобра представели покраїнски секретар за социялну политику, демоґрафию и ровноправносц полох Предраґ Вулетич, директорка Заводу за ровноправносц полох Диана Милович и городоначалнїк Зренянину Чедомир Янїч.

8-Zeni-02

ПОВЯЗАНИ ТЕКСТИ