СЕРБИЯ/ШВЕТ – Ютрейши Медзинародни дзень женох, 8. марец, ширцом швета ше означує як здогадованє на демонстрациї америцких роботнїцох у Чикаґу 1909. року и нюйоршки марш (у ЗАД), у хторим участвовали вецей як 15 000 жени, котри вимагали лєпши условия за живот – кратши роботни час, лєпши плаци и право гласа.
Шлїдуюцого, 1910. року, на Другей медзинародней конференциї женох социялистох у Копенхаґену, у Данскей, хтора отримана 8. марца, тот датум установени як Дзень женох. Иницияторка тей идеї була нємецка феминисткиня Клара Цеткин, а перши держави у хторих означени тот дзень були Австрия, Нємецка, Швайцарска и Данска 1911. року. Поступнє го прилапйовали и други держави, же би Зєдинєни нациї 1975. року 8. марец урядово преглашели за Дзень женох.
У Сербиї ше тот дзень означує од 1914. року, а з тей нагоди кажди рок орґанизовани рижни трибини, гуманитарни акциї и други програми з хторима ше обраца увагу и на положенє женох у дружтве и на претаргованє дискриминациї.