КУЛА – Нєзадовольни бувши роботнїки фабрики „Кулски штофи” АД, як и други роботнїки нєуспишно приватизованих фирмох з Кули и кулскей општини, вчера у Кули отримали протестни шпацир, хтори орґанизовали нєзадовольни роботнїки и народна посланїца Лиґи социялдемократох Войводини Олена Папуґа.
После сходу опрез капури Штофарнї, учашнїки протесту пошли опрез будинку Општини, дзе на писарнїци придали свойо вимоги, а медзи иншим то и питаня же прецо половка роботнїкох Штофарнї з Фонду солидарносци достали пенєж, а половка нє; хто одредзовал же хто достанє пенєж, як и цо ше збуло з маєтком тей дакеди барз успишней кулскей фабрики.
Як з тей нагоди гварела народна посланїца Олена Папуґа, котра о проблемох роботнїкох Штофарнї нєдавно и у Народней скупштини Сербиї компетентним поставела вецей посланїцки питаня, циль вчерайшого сходу бул указац на подли приватизациї у скоро шицких фирмох хтори дакеди були слупи економиї у Кули и у кулскей општини.Бувши роботнїки наглашели же нє глєдаю социялну помоц, алє лєм тото цо им припада по законє, як цо то 12 минимални заробки, социялна програма, заостати плаци.
На вчерайшим протестним сходзе присуствовали коло 150, векшином бувши роботнїки Штофарнї, алє и других фабрикох, а приключели им ше и гражданє, виражуюци потримовку роботнїком.
