РУСКИ КЕРЕСТУР – Парохийни Каритас керестурскей парохиї нєшка будзе домашнї Стретнуцу волонтерох парохийних Каритасох нашей епархиї св. оца Миколая, а з тим будзе означена и 25-рочнїца нашого донєдавна Еґзархатского, а тераз Епархийного Каритасу.
Стретнуце будзе тирвац од 13 до 17 годзин, сход пол годзини пред початком, а на 17 годзин будзе Архиєрейска Служба хтору будзе предводзиц наш владика кир Георгий Джуджар зоз священїками.
На стретнуцу ше здогаднє на истироят нашого Каритасу, будзе преглїбене и значенє тей важней церковней институциї. Викладаче буду о. Иштван Добаи зоз Сенти и нашо священїки о. Михайло Малацко и о. Владислав Варґа. Буду винєшени и искуства з наших парохийох и предложени напрями за дальшу роботу.