СЕРБИЯ – Продукцию палєнки ше будзе контроловац же би ше обезпечело квалитет за конзументох, алє пред и з уходзеньом до Европскей униї печенє палєнки нє будзе забранєне, як цо ше уж єден час нагадовало. Шеф Делеґациї Европскей униї у Сербиї Майкл Девенпорт то потвердзел и додал же кажда держава ма свойо националне пице.
– Кажде може печиц палєнку, у шицких державох ше то роби и печенє палєнки за особни потреби нїґдзе нє престало. За напой хтори ше продукує за широке хаснованє важа правила хтори би мали защициц квалитет – гварел Девенпорт.
Нови закон о моцним алкоголним напою, хтори на явней розправи по 18. юлий, ма ускладзиц нашу реґулативу з реґулативу у Европскей униї, а оможлїви и польопривреднїком же би звишок палєнки предали продуковательом. Так нови закон либерализує продукцию и польопривреднїком да можлївосц же би у скромних условийох и з малима трошками преробели овоц до палєнки.