КОВАЧИЦА – У орґанизациї Мисиї ОЕБС-у у Сербиї, а у сотруднїцтве з Канцеларию за людски и меншински права и Министерством култури и информованя, у Ковачици 19. и 20. юлия отримана обука за членох, лєбо представительох националних совитох националних меншинох у Сербиї о управяню з финансиями и проєктами.
На семинаре участвовали представителє векшини НС-ох, медзи нїма и нашого, а пре тему обуки, спред НС Руснацох участвовали два заняти особи у канцелариї Совиту.
Учашнїком представителє Канцелариї за людски и меншински права, та Министерства култури и информованя бешедовали о пририхтованю програмних активносцох у єдним буджетним року, анализовани финансийни звити, преподаване о будуцим проєктним финансованю НС-ох, о родним буджетованю совитох, як и о улоги НС-ох у проєктох з обласци култури и информованя на меншинских язикох.