РУСКИ КЕРЕСТУР – На порядней Скупштини, хтора всоботу, 27. фебруара отримана у Руским Керестуре, присутни акционере Винїци „Руски двор” д.о.о. принєсли одлуку о докапитализованю Акционереского дружтва.
Докапитализовац годни шицки 46 акционере „Руского двору” под єднакима условияли, а то у висини до 10 одсто терашнього цалосного сновательного улогу. Як одлучене, докапитализованє почина нєшка, 29. фебруара, а тирва по 31. октобер того року, з тим же ше у наступних двох тижньох акционере маю вияшнїц о тим чи жадаю и з яку суму буду участвовац у докапитализованю Дружтва.
На Скупштини у Керестуре, хтора отримана у Доме ремеселнїкох, присиствовали 28 акционере „Руского двору” з Дюрдьова, з вецей наших местох у Сриме, Вербасу и з Керестура, а предшедовал предсидатель Скупштини Дружтва Мирон Сабадош.
Прилапени звит о роботи и финансийох, у хторим визначене же прешли рок по роду и квалитету грозна бул вельо успишнєйши як 2014. и випродуковани прейґ 6,1 ваґони грозна. Надосц укладане и до опреми за винїцу и до пиньвици так же, як гварене, з предаваньом и вина хторе на лаґеру, прешли рок ше закончи з „позитивну нулу”.
Праве пре нове укладанє до тогорочней продукциї принєшена одлука о докапитализованю, а на Скупштини заключене и же ше до Покраїни будзе конкуровац на конкурс за средства за обезпечованє роботи єдному приправнїкови, хтори би 12 мешаци бул заняти у „Руским дворе”.
