Од 1. мая пременка роботного часу за погосцительох и тарґовцох

автор 021/зам; фото:021
1.5k Опатрене

НОВИ САД – На нєдзелю, 1. мая, у Новим Садзе почина применьованє новей Одлуки о роботним чаше погосцительних обєктох и тарґовинох, хтора принєшена у децембру прешлого року.

З Одлуку тераз детальнєйше утвердзени роботни час спомнутих обєктох, та так од 1. мая нон-стоп годни робиц погосцительни обєкти на бензинских пумпох на уходох до городу, а пумпи у городзе од 6 до 20 годзин. Нєпреривно можу робиц и обєкти хтори предаваю „швидке єдзенє” у дїловних будинкох, киоскох и баракох.

Шицки други погосцительни обєкти годни робиц од 7 до 23, односно 24 годзин, як були дотераз.

До трох вноци робота дошлєбодзена лєм погосцительним обєктом у дїловних будинкох и на плївних обєктох, алє за тото муша мац окремну дозволу Городскей управи за привреду.

Город дефиновал и максимални роботни час за предавальнї, ремеселски роботнї и обєкти за бависка на щесце, и то од 6 до 24 годзин. Тарґовини роботу можу предлужиц лєм з дозволу Городскей управи за привреду. 

ПОВЯЗАНИ ТЕКСТИ