ОСИЄК – У орґанизациї КУД Руснацох Осиєк, стреду, 12. октобра, у просторийох КУД отримани Мемориялни турнир у столним тенису „Владимир Тимко”. Турнир интерного характеру, як здогадованє на покoйного члена и снователя здруженя Руснацох у Осиєку Владимира Тимка, котри нєсподзивано умар 2008. року.
На Турнире участвовали дзешецеро бавяче – Ян Мишир, Томислав Мишир, Зденко Сивч, Мирко Рибич, Татяна и Гелена Тимко (дзивки покойного Владимира), Владимир Еделински, Ромко Гаргай, Мирослав Дїтко и Агнетка Балатинац.
Перше место освоєл Владимир Еделински, друге Томислав Мишир, а треци бул Мирослав Дїтко. Судзел наш познати столнотениски фаховец Яким Голик.
КУД пририхтало скромни награди побиднїком, хтори уручела Славица Тимко, ґдовица покойного Владимира.
По змаганю ше бавяче и други присутни, шицки члени КУД Руснацох Осиєк, погосцели з пасулю, хтору за тот турнир уж традицийно готовя Зденко и Манда Сивчово.
