О Руснацох за бечелор тезу

автор тах
1.4k Опатрене

По налогу свойого професора зоз Державного универзитету у Праги, на департману за антрополоґию, двацецдварочни студент Якуб Ковар зоз Ческей у септембре нащивел нашу жем, а у нєй глєдал праве Руснацох.

Виглєдуюци нашо звичаї, наш язик, национални єдла, фолклор, розпитуюци ше о нашому положеню у держави, Якуб мал написац дисертацию у рамикох проєкту „Пестра Европа” хтори облапял роботи о вельким числу меншинох хтори жию у розличних часцох Европи.

– Мойо товарише наприклад достали задаток же би випитали як жию Турки у Болгарскей, лєбо Татаре на Криму. Я достал задаток випитац ситуацию Руснацох у Войводини, як жию нєшка, з якима ше нєшка проблемами стретаю, цо им ше пачи, а зоз чим су нєзадовольни. Найважнєйше, интересує ме яку подпору вам дава держава – гвари Якуб.

Же би дошол до потребних податкох, потим як на автобусу припутовал до Нового Саду, Якуб ше рушел по наших местох. Нащивююци нашо институциї и установи, Якуб дознал вельо о Руснацох, а у своєй нащиви упознал велїх людзох.

Нащиву започал у Дружтве за руски язик, литературу и културу у Новим Садзе, а отамаль з автобусом пошол до Руского Керестура. Потим як у Керестуре бешедовал зоз Жельком Ковачом, нащивел замок, видзел церкву и школу, Якуб надумал же по Коцур будзе стопирац. На драгу го позберал Вербащань Славиша Иґнятович, хтори ше барз заинтересовал за його приповедку, и прейґ своїх контактох бул му од велькей помоци. Одведол го нащивиц КПД „Карпати” у Вербаше, а потим предлужели до Коцура, дзе ше Якуб стретнул зоз Аранку Медєши, и обишол Етно-клуб „Одняте од забуца”, коцурски церкви, и валал. Свою нащиву Якуб закончел после пейцох дньох там дзе и почал, у Новим Садзе, у Дружтве за руски язик, литературу и културу.

Попри нових искуствох, Якуб до Праги однєсол вельке число фотоґрафийох, и покончену анкету зоз хтору ше приблїжел ґу людзом, и дошол до їх думаньох. Як гвари, зоз своєй нащиви, о Руснацох барз вельо научел, а найвецей го зацикавело же їх язик барз подобни нашому.

– Найвецей ми ше пачело же ше розумиме, и же з вами можем бешедовац по чески. Бал сом ше же будзем мушиц бешедовац на анґлийским и найсц дакого най ми преклада. Думал сом же стретнєм и православних Руснацох, алє сом ше прешвечел же ви шицки грекокатолїки. Дознал сом же Руснаци у Войводини очували свой язик и школство, же маце свой телевизийни канал и други медиї, и добре розвити фолклор. Барз ми ше пачело же людзе приємни и же вшадзи шицко чисте и пошорене – гвари.

Робота хтору Якуб ма написац лєм початна часц його бечелор тези хтору будзе писац на тему Руснацох у Войводини, кед студиї будзе закончовац, та наш край можебуц и ознова нащиви.

ПОВЯЗАНИ ТЕКСТИ