НОВЕ ОРАХОВО – Розподзельованє пенєжу хторе Роботне цело за младеж Националного совиту (НС) Руснацох наменєло за Конкурс за софинансованє младежских проєктох з обласци култури, розваги и шлєбодного часу, волонтеризму, нєформалней едукациї, информованя и спорту було главна точка на пиятей порядней схадзки Роботного цела, отриманей всоботу, 9. априла у Новим Орахове. Спомедзи 19 проєктох хтори сцигли на Конкурс, Роботне цело за младеж 250 000 динари розподзелєло 17 проєктом.
При додзельованю средствох ше водзело рахунку же би кажде место одкаль послати проєкти достало даяки пенєж, а вигласане же ше нє будзе софинансовац журки хтори нє маю вязи з руску културу, односно музику.
Одлучене же 30 000 динари достанє „Pact Ruthenorum” з Руского Керестура за орґанизованє мултимедиялней манифестациї младих „Дньовка”, проєкт новосадского Руского културного центру (РКЦ) „Акустика рутеника” достанє 29 000 динари, а проєкт РКЦ „Литературно-музични стретнуца за младих” 25 000 динари.
По 20 000 динари достаню Туристичне здруженє Руски Керестур (ТЗРК) за Медзинародни волонтерски камп, як и часопис МАК за безплатни прикладнїки младим по наших местох. По 15 000 динари достаню КУД „Тарас Шевченко” з Дюрдьова за „Литературни вечар младих”, Коцурске здрженє младих за „Акцию 2016”, КУД „Жатва” з Коцура за „Лєтнї биоскоп” и „Еко-ґерила” з Орахова за ожелєньованє Нового Орахова.
Форум младих Рускей матки за свой проєкт „Креативни часи” достанє 12 000 динари, а по 10 000 динари опредзелєни за Циклус креативних роботньох КУД „Тарас Шевченко” и за журку „Тамбуранє” у орґанизациї КУД „Жатва”.
За Вечар сучасней рускей творчосци за младих КПД „Дюра Киш” зоз Шиду опредзелєни 9 000 динари, за проєкт „Нарисуй свой швет” КПД „Карпати” з Вербасу 8 000, а за „Лєтнї chillout“ TЗРК 7 000 динари. По 5 000 динари достаню проєкти Едукация и роботня „Велька ноц” КПД „Карпати“ и „Мозаїк прешлосци за будучносц” РКУД „Гавриїл Костельник” з Кули.
Роботне цело одлучело же 30 000 динари за порядну дїялносц опредзелї Здруженю „Pact Ruthenorum”, а попри членох Цела и дзепоєдних младих котри представели свойо проєкти, на схадзки у Орахове присуствовали и предсидатель Вивершного одбору НС Желько Ковач и секретар НС Таня Арва Планчак.
