ШИД – Вчера у сали Скупштини општини Шид подписани контракти помедзи локалну самоуправу, виводзачми роботи и гражданох, а по явним конкурсу за унапредзованє енерґетскей ефикасносци хижох и квартельох.
На конкурс ше приявели коло 50 гражданє, а окремна Општинска комисия на чолє зоз заменїком предсидателя Општини Дьордьом Томичом одредзела 28 гражданох хтори сполнєли условия конкурса.
Средства опредзелєла локална самоуправа и то два милиони динари, тиж тельо и Министерство рударства и енерґетики, а 50 одсто вредносци роботи финансую сами гражданє.
Средства додзелєни за уградзованє такволаного ПВЦ тишлєраю, потим за термо-изолацию хижох, за набавку котлох на пелет и обновлїви горива, як и за соларни панели.
