НОВИ САД – У Покраїнскей влади вчера уручени контракти представнїком добродзечних огньогасних дружтвох зоз Войводини котрим додзелєни безповратни средства за финансованє програмох од явного интересу котри важни за защиту и ратованє од огньох у 2022. року.
Контракти уручел покраїнски секретар за польопривреду, водопривреду и лєсарство Чедомир Божич, котри з тей нагоди гварел же по конкурсу того року додзелєни средства 51 здруженю у вкупней суми 20 милиони динари.
Средства по тим конкурсу достало и Добродзечне огньогасне дружтво Руски Керестур, вкупно 300.750 динари.
Божич додал же ресорни покраїнски секретарият у идуцим року обезпечи и векши средства за тоту наменку, и за ище векше число здруженьох.