НОВИ САД – Покраїнски секретарият за културу, явне информованє и одношеня з вирскима заєднїцами розписал конкурс вредносци 5,5 милиони динари за финансованє обнавяня церквох у Войводини хтори маю статус защицених памятнїкох.
З тим конкурсом Покраїна будзе софинансовац будовательни, добротворни и науково дїялносци реґистрованих традицийних церквох и вирских заєднїцох – Сербскей православней церкви, Римокатолїцкей церкви, Грекокатолїцкей церкви, Румунскей православней церкви, Исламскей заєднїци, Єврейскей заєднїци, Словацкей євангелистичней церкви а.в, Реформатичней християнскей церкви и Євангелистичней християнскей церкви а.в., як и їх орґанизацийох и установох.
На конкурс ше можу приявиц лєм владичества и еґзархати, и то лєм з єдним проєктом за обнавянє єдней церкви. Пенєж муша потрошиц лєм за обнаянє церкви, а цо нє потроша, будзе врацене до буджету.
Приявиц ше мож по идуци пияток, 16. децембер, а документация за конкурс ше находзи на сайту Покраїнского секретарияту за културу, явне информованє и одношеня з вирскима заєднїцами www.kultura.vojvodina.gov.rs/.