НОВИ САД – Подпредсидатель Покраїнскей влади и покраїнски секретар за образованє, предписаня, управу и национални меншини-национални заєднїци Михаль Нїлаш на вчерайшей конференциї за медиї бешедовал о актуелних конкурсох хтори Секретарият розписал у обласци образованя и у обласци витворйованя меншинских правох и вирских питаньох.
Секретарият 7. марца, заключно зоз 31. марцом, розписал 13 конкурси за 2016. рок, а їх вкупна вредносц 138 412.230,10 динари. Од того 115 435.815,00 динари опредзелєни за осем конкурси з обласци образованя, а 22 976.415,00 динари предвидзени за пейц конкурси з обласци витворйованя правох етнїчних заєднїцох, церквох и вирских заєднїцох.
–У одношеню на прешли рок, того року источашнє розписани шицки конкурси. Думам же то барз добре, бо чим ше заключи и препатри конкурси, уж штредком априла будземе мац конкретни резултати – виявел Нїлаш.
Конкурси и условия конкурсох обявени у „Службених новинох АП Войводини”, у дньових новинох „Дневник”, у друкованих медийох хтори виходза на язикох националних меншинох, як и на сайту Покраїнского секретарияту www.puma.vojvodina.gov.rs и на сайту Покраїнскей влади www.vojvodina.gov.rs. Шицки конкурси отворени до 31. марца 2016. року.