ДЮРДЬОВ – У дюрдьовскей церкви рождества Пресвятей Богородици всоботу, на Треци дзень Крачуна, владика кир Георгий Джуджар служел Архиєрейску Службу Божу, а по законченю Служби мировал вирнїкох.
Владика Георгий у своєй казанї здогаднул же Бог послал свойого сина на тот швет же би з нами жил и остал навики.
– То радосц нєшкайшого швета и жридло нашей надїї и вири – гварел владика Георгий, а потолковал и значносц Святого року – року Милосердия и поволал шицких же би вихасновали тоту нагоду и прейґ споведзи, причасци, молитви и покаяня, у тим року достали полни одпуст.
На Архиєрейскей Служби Божей сослужовал дюрдьовски парох о. Йоаким Холошняй, а шпивали члени фамилиї Холошняй, вєдно з ґосподїнским парохом о. Михаилом Холошняйом и дюрдьовским вироучительом Данилом Задрепком.
По законченю Служби, у церковней сали владику привитал предсидатель Церковного одбору Янко Салак , а присутни з коляду владикови повинчовали Крачун.
