РУСКИ КЕРЕСТУР – Приятельске стретнуце пионирох Фодбалского клубу Русин и ФК Сут’єска, отримане всоботу, 11. новембра, у Бачким Добрим Полю, на хторим були одбавени два змаганя.
У першим змаганю бавели дзеци народзени 2009. и 2010. року, а ґол за свою екипу дал Тони Орос, на асистенцию Луки Фа.
У екипи младших пионирох наступели – Лука Фа, Стефан Настасич, Марко Колошняї, Андрей Провчи, Матей Макаї, Алекса Сопка, Марко Драґутинович, Тони Орос, Лука Стойков.
У другей часци змаганя наступела старша екипа, односно дзеци народзени 2008. и 2009. року, на хторим два ґоли за свой тим дал Андрей Чизмар, а треци ґол дал Кристиян Малацко. Домашнї по сам конєц бавели борбено, оштро, правели надосц фаули, но и попри шицким тим, резултат од 3:1 за Русин остал по сам конєц.
Старши пионире бавели у составе – Валентина Кочиш, Даниєл Надь, Кристиян Малацко, Йован Плавшич, Давид Джуня, Андрей Чизмар, Теодор Штранґар и Хана Будински.
Понеже ше Спортска гала у Бачким Добрим Полю находзи у обєкту Основней школи „Вук Караджичˮ, младих бавячох Русину зоз тренером Зденком Шомодїйом, привитали и дочекали директор тей школи, як и двоме тренере, зоз чим указали почитованє и вельке госцопримство.
На соботу, 18. децембра, заплановане ище єдно приятельске стретнуце процив ФК ЦФК зоз Вербасу.
