КОЦУР – Вчера, на Перши дзень Велькей ноци, медзи двома службами – Дзецинску и Вельку, на 9,30 годзин у Церковней сали грекокатолїцкей церкви у Коцуре отримана Вельконоцна програма и вистава, хтору орґанизовал Церковни одбор, КПД „Док” и Цецилия и Славица Чельовски. Свойо доприношенє тей подїї дали и Зденка Намачиньски, ш. Михаїла Воротняк и Маринко Єж.
На програми участвовали школяре руского оддзелєня 4. класи коцурскей Основней школи з рецитациями и шпиваньом, як и Церкоцвни хор нашей грекокатолїцкей церкви з двома пригоднима шпиванками. На вистави були виложени школярски роботи, писанки, погляднїци, ручни роботи и образи.
У Церковней сали була виложена и часц фотоґрафийох з прешлосци и терашньосци коцурскей грекокатолїцкей церкви, з хторих часц будзе вибрана и обявена у моноґрафиї „Чувар вири, язика и руского народа”, з нагоди ювилею – 250-рочнїци грекокатолїцкей церкви у Коцуре, у авґусту. Одвичательни редактор моноґрафиї др. Михайло Фейса виявел же текст за моноґрафию уж докончени и рецензовани.
