РУСКИ КЕРЕСТУР – У полней Катедралней церкви св. оца Миколая зоз Благодарну архиєрейску Службу Божу, вчера на 17 годзин, почала 12. Централна шветочносц Националного швета Руснацох у Републики Сербиї.
Благодарну Литуґию предводзел наш преосвящени владика нєдавно преглашеней епархиї св. оца Миколая у Руским Керестуре кир Георгий Джуджар, зоз дзешец домашнїма и священїками з других наших парохийох, у присустве визначних госцох з нашого националного, културного и политичного живота, и числених вирних з домашнєй парохиї и госцох зоз велїх наших местох.
Владика Георгий у своєй казанї привитал шицких же ше зишли „ту дзе велїм блїзши лєбо дальши коренї, як одроснути дзеци ґу своєй мацери подзековац єй за живот, помоц и потримовку” – започал владика и визначел же снованє Руского народного просвитного дружтва (РНПД), пред 100 роками, дало початок националного и културного розвою Руснацох, а його преднякох ше з гордосцу здогадуєме.
– Подзековни зме за шицки тоти дари, алє зме покус застарани за нашу будучносц. А вона барз завиши нє лєм од обставинох, алє и од шицких нас, як поєдинцох так и заєднїци.” – заключел владика.
Євангелске читанє читал капелан керестурски о. Михайло Шанта, апостол домашнї дзияк Янко Виславски, а шпивал домашнї Мишани хор катедрали св. оца Миколая и Дому култури под руководзеньом Лидиї Пашо.
На Служби Божей медзи госцами бул присутни и амбасадор України у Сербиї, його екселенция Олександер Александрович. По Служби вон у владическей крипти у мено своєй держави положел венєц на гроб преосвященого владики Дионизия Нярадия.
Вецей фотоґрафиї мож поопатрац у нашей фотоґалериї.