Цо скорей ришиц проблем явних набавкох у каменїцких институтох

автор  ртв/сен
749 Опатрене

НОВИ САД – На схадзки Скупштини Войводини, хтора отримана пияток, 20. марца, розправяне о предлогу посланїкох Сербскей напредней странки (СНС) о утвердзованю одвичательносци за препущеня у запровадзованю явних набавкох за опрему за здравствени институти у Сримскей Каменїци, медзитим з векшину гласох их заключеня нє прилапени.

Посланїки СНС вимагали же би ше утвердзело одвичательносц задлужених покраїнских институцийох, директорох Институту за онколоґию, Институту за хороти плюцох и Управи за капитални укладаня, та же би ше их розришело з тих функцийох пре препущеня у поступкох явних набавкох за опрему.

Посланїки СНС визначели же у процесу явних набавкох фаворизована фирма „Вариян“, та остатнї два роки тендер два раз цалком препаднул. То загрожело и так чежки стан у применьованю зарйованя, а представнїки СНС преволали покраїнску власц за пожнєнє вибудови, опреманя комплексу „Каменїца 2“, та пре цену, хтора будзе вельо драгша як плановане.

Представителє Демократскей странки (ДС) при концу схадзки поцагли свойо заключеня, у хторих було наведзене же спомнути институти у Каменїци и Управа за капитални укладаня по законє запровадзовали поступки явних набавкох. Зложели з опозицию же треба цо скорей и на цо лєпши способ ришиц проблем набавки опреми.

Покраїнска секретарка за здравство Весна Копитович гварела же „Каменїца 2“ будзе єден з капиталних обєктох у здравственей системи Войводини, алє покля до ньго нє сцигню три апарати за зарйованє, вон нє годзен цалком функционовац.

За препущеня у поступкох явних набавкох вона обвинєла Републичну комисию за защиту правох понукачох, понеже у законским чаше нє дала одвит у вязи з тендером.

 

ПОВЯЗАНИ ТЕКСТИ