ДЮРДЬОВ – У 11. колу Подручней фодбалскей лиґи Нови Сад, хторе одбавене 23. Октобра у Темерину, фодбалере ФК Бачка 1923 зоз Дюрдьова страцели у стретнуцу зоз фодбалерами ТСК Темерин, зоз резултатом 2:0.
Од початку стретнуца на терену було обачлїве моцне и оштре бависко, а фодбалере обидвох екипох ше намагали на кажди способ дойсц до лабди и посцигнуц ґол за свою екипу, алє по конєц першого полчаса таке ше нє случело. З другого боку, перши пол час закончени зоз двома жовтима картонами и єдним червеним.
У другим полчаше фодбалере ТСК бавели лєпше и удало им ше посцигнуц два ґоли, у 75. минути и у 84. минути. Як и у першим полчаше, та так и у другим нє було спортского справованя на терену. Стретнуце закончене зоз ище шейсц жовти картони и зоз ище два червени.
После того кола ФК Бачка 1923 на пиятим месце зоз двацец єдним бодом. У шлїдуюцим колу дюрдьовски фодбалере на домашнїм терену привитаю фодбалерох Фрушкогорца зоз Сримскей Каменїци.