Дина Мудрох того року закончела Основну школу „Йован Йованович Змай” у Сримскей Каменїци. Успишна матурантка попри Вуковей дипломи, достала и специялну награду як школярка ґенерациї за дружтвени науки.
Тиж так вона достала и диплому од Школи за физичне воспитанє, потим диплому зоз своєй школи за руски язик, а влонї достала и Припознанє „Славка Сабадош” од Дружтва за руски язик, литературу и културу, а тото окреме радує, прето же було проблеми коло ученя руского язика, бо єдного року нє була орґанизована анї ґрупа.
Дина Мудрох тих дньох наступала, зоз свою школу, у Беоґрадзе на отвераню Медзинародней школскей олимпияди у одбойки. Дзевец роки танцує у Партизану 2 и ма свою соло хореоґрафию.
Як дознаваме, Дина Мудрох ше тих дньох уписала до новосадскей Ґимназиї „Исидора Секулич”:
– Любим психолоґию, а интересує ме и педаґоґия, та ми на тестох професийней ориєнтациї препоручели уписац ше до ґимназиї. Я вибрала новосадску Ґимназию „Исидора Секулич”, успишно сом положела примаци испит, та од єшенї ту предлужим свойо школованє – гварела Дина Мудрох.