НОВИ САД – Реґионална конференция Билатерални спорозуменя о защити правох националних меншинох – важни инструмент будзе отримана 23. юния у Хотелу Пупин.
Центер за реґионализем прешлих рокох робел виглєдованє о применьованю билатералних спорозуменьох о защити правох националних меншинох, хторе Державна заєднїца Сербия и Чарна Гора заключела 2004. року, а Република Сербия превжела як часц свойого правного нашлїдства. Спорозуменя подписани зоз Републику Горватску, Мадярску, Румунию и Републику Сиверну Македонию.
Округли стол ше орґанизує з цильом же би ше зоз представнїками компетентних державних орґанох Републики Сербиї и Автономней Покраїни Войводини направело паралелу медзи станом яки утвердзени зоз виглєдованьом и актуалней ситуациї на терену. Намира же би ше спатрело функционалносц спорозуменьох, хтори значни за защиту правох меншинских заєднїцох и очуванє їх националного идентитету.
На Конференциї буду представнїки компетентних державних орґанох, дипломатски представнїки зоз спомнутих державох, институциї националних меншинох, нєзависни експерти, орґанизациї цивилного дружтва…
Конференцию орґанизує Центер за реґионализем зоз потримовку Фондациї „Hanns Seidel”.