Того лєта у Руским Керестуре буду отримани штири спортски турнири – Ноцни турнир у малим фодбалу котри закончени пондзелок, такой стреду после нього почал ище єден фодбалски турнир наволани Улїчни турнир 3 на 3, Турнир у одбойки на писку, як и Турнир у кошарки. Шицки турнири орґанизую млади ентузиясти, зоз скромнима, та аж и нїякима средствами, на запущених теренох хтори пред тим сами ушорели.
Тиж, през лєто ше орґанизовало и варенє котлїкох у шицких наших местох, та попри рекреативних спортистох на турнирох, могли ше, односно ище вше ше можу опробовац и кухаре аматере, понеже ище вше нє отримани шицки змаганя.
Гоч лєто традицийни период за одход на лєтни одпочивки, за лєтованя на морю, коло рикох, або у брегох, праве тот час Национални совит и вихасновал як нагоду же би руских школярох зоз шицких наших местох дзе ше руски язик учи як виборни предмет, и дзе ше настава одвива цалком на руским язику, одведол на традицийну лєтну школу до Попраду. Праве док заключуєме тото число новинох, 33 школяре и седмеро викладаче допутовали дому, а о тим у идуцим чишлє будзе обсяжнєйши звит.
Представнїки рускей заєднїци зоз Мадярскей обдумали фахово-рекреативну екскурзию до Войводини, а нєдавно закончели свою нащиву, медзи иншим, и рускей заєднїци у нєй. Так, перше пообиходзели знаменїтосци на сиверу Покраїни, потим пришли до Нового Саду, урядово нащивели Филозофски факултет у Новим Садзе и Завод за културу войводянских Руснацох. Кед госци позберали упечатки на єдно место, тото цо ше видвоєло, то же ше тота делеґация, по їх словох, наисце спатра на руску заєднїцу у нашей держави, и же нам „завидза” як зме ше отримали, же маме цалу образовну вертикалу, же чуваме свой язик и писмо, а у нїх цалком иншак. Як гваря, млади ґенерациї знаю же су Руснаци, алє мацерински язик нє знаю, и бешедую по мадярски и анґлийски.
Попри тим, єст часу и за озбильнєйши активносци – Керестурци ознова порушали активносци коло закладаня за розришованє длугорочного проблему коло води за пице, а гражданє жабельскей општини орґанизую протести пре застараносц за очуванє природи и околїска, пре наявену вибудов фабрики за рециклованє пнеуматикох.