Виберанки за национални совити националних меншинох нагода же бизме одлучели хто будзе заступац интереси нашей заєднїци у наступних штирох рокох.
Виберанки за членох националних совити буду отримани 8. новембра,
21 меншинска заєднїца сполнює предусловия за директни виберанки, а медзи нїма и наша, руска, а попри нїх и албанска, ашкалийска, бошняцка, болгарска, бунєвацка, влашска, греческа, єгипетска, мадярска, македонска, нємецка, польска, ромска, румунска, словацка, словенска, українска, горватска, чарногорска и ческа, док два меншински заєднїци – ґоранска и русийска, отримаю електорски скупштини на котрих ше вибере членох їх националних совитох.
Тота нєдзеля нє лєм ище єден датум у виберанковим календаре, то нагода же бизме ше запитали чи зме досц упознати зоз правами котри нам, Руснацом, припадаю, кельо участвуєме у приношеню одлукох котри окреме значни за нашу заєднїцу, и яки обчекованя маме од особох котри нас буду представяц у наступних штирох рокох.
Национални совити националней меншини представяю форму меншинскей самоуправи, їх улога нє лєм же би були прикраска демократскей системи, анї нє же би исновали бо так предвидзене зоз законом. Национални совити маю озбильни компетенциї зоз котрима предвидзене очуванє идентитету националних заєднїцох – образованє, култура, информованє и службене хаснованє язика и писма. То обласци котри нєпоштредно дотикаю каждодньови живот припаднїкох националних меншинох.
Важне же би и кажди припаднїк рускей националней меншини бул свидоми тих фактох. Попри тим, значна и свидомосц о праву як вихасновац свой глас, и як ше уписац до Окремного виберацкого списку (ОВС). Бо право гласа ше здобува лєм зоз уписованьом до ОВС, упис ше окончує лєм раз, а уписац ше може кажда полнолїтна особа.
ОВС ма окремну улогу у виберанковим процесу, а информованосц о виберанковим процесу нє шме остац занєдзбана.
Важне знац котри нашо права, же бизме розумели виберанкови процес и процедури, и же би ше о будучносци нашей рускей заєднїци бешедовало отворено и одвичательно.
Национални совит ма свойо законски компетенциї и одвичательносци, алє моц єдней заєднїци завиши и од єй интересованя, анґажованя и порихтаносци же би участвовала у явним живоце.
Наш язик, наша култура, нашо образованє, нашо информованє – наша одвичательносц.