ОХРИД (СИВЕРНА МАКЕДОНИЯ) – Новосадска парохия св. апостолох Петра и Павла орґанизовала паломнїцтво и нащивела грекокатолїцки церкви у Сиверней Македониї од 25. по 28. септембер.
Паломнїкох у Охриду сердечно дочекал и привитал парох Церкви святих Кирила и Методия и Бенедикта о. Оливер Тантушев, хторого вирни и препознали понеже бул єден час, капелан у Коцуре.
Всоботу, после Служби Божей паломнїки зоз водзачом нащивели город Охрид, прешейтали по центре, указани им церкви и стари, автентични улїчки коло озера, у старей часци города видзели антични театер и вец ше виґрабали на брег дзе збудована Церква святого Климента и Пантелеймона. Нєшкайша церква збудована 2002. року у то ахитектонска реконсктрукция дакедишнього храму святого Пантелеймона хтори збудовал Климент Охридски, епископ и ученїк святих Кирила и Методия.
Внєдзелю, после Служби Божей на хторей означене швето Воздвиженє Чесного Хреста, паломнїки на ладї по Охридским озеру пошли на найюжнєйшу часц Сиверней Македониї и нащивели манастир святого Наума Охридского. У манастирскей церкви находза ше мощи славянского просвитителя и писателя святого Наума, ученїка солунских братох святих Кирила и Методия. Святи Наум Охридски вєдно зоз святим Климентом Охридским ширел писменосц и християнство на просторох южного Балкану, а найвецей коло Охридского озера.
Остатнї дзень новосадски паломнїки пред поладньом нащивели Катедралу Пресвятого Шерца Исусового у Скопю, дзе могли циловац мощи Мати Терези, сновательки Мисионеркох любовии прешейтали по городзе.
