ВЕРБАС – Як єдна з тирвацих вредносцох соботовей Централней преслави Националного швета Руснацох у Вербаше останє и моноґрафиї „Руснаци у Вербаше”, на хторей студиозно, коло пол рока робел тим вецей особох. Промоция отримана у Шветочней сали Ґимназиї „Жарко Зренянин” на 15,30 г., а госцох привитали Ксения Макаї Орос и Звонко Сабо, котри водзели програму и нащивительох преведли през змист кнїжки, док виривки з моноґрафиї читали Даря Медєши и Мирослава Даждиу.
Пречитани виривки з уводного слова академика Юлияна Тамаша, з уводного слова преосвященого владики кир Георгия Джуджара, з прилогу у кнїжки др Янка Рамача, тексту Мирона Жироша, часци о вирским живоце, хтори писали о. Роман Миз и Славко Сабо и други.
Промоцию збогацел и скеч хтори виведол Яким Папуґа як Дїдо Ферко, а його наступ обдумали Звонко Сабо и Славко Орос.
На програми з вецей шпиванками участвовали и музичаре и шпиваче Микола Чижмар Коле, Данил Чижмар и Михал Тамаш, а директорка НВУ „Руске слово” Мартица Тамаш представела найновше, специялне число новинох „Руске слово”, друковане з нагоди Националного швета Руснацох.
Як визначене на промоциї, тей кнїжки би нє було без Заводу за културу войводянских Руснацох, хтори препознал значносц такого подняца.
На концу програми госци з України и Словацкей и предсидатель Националного совиту Руснацох Славко Рац и предсидатель КПД „Карпати” Деян Загорянски вичерали пригодни дарунки.
