Зєдинєни Америцки Держави у перших двох мешацох 2026. року зламали остатнї остатки, и так крегкого медзинародного права котре, углавним, одпором праве зоз ЗАД будовали од конца Другей шветовей войни. Киднаповали предсидателя сувереней держави Венецуели Николаса Мадуру, и нападли суверену державу Иран, вєдно зоз свою найвекшу воєну базу на Блїзким Востоку, познату як держава Израїл.
Найкратше поведзено, то империялизем (ширенє продукциї, експлоатация природних ресурсох, без огляду яки су и дзе су) и здобуванє профиту капиталистох.
Империялистична держава найшвидше шири и найшвидше витворює нови ресурси – зоз войну. Зоз тим, воєно-индустрийни картели, наймоцнєйше пасмо вельких капиталистих, найшвидше витворюю профит теди кед война, без огляду на тото хтори бок траци, а хтори достава.
Вец, ґенерално, шицким вельким капиталистом, аж и кед су нє власнїки воєно-индустийного комплексу, алє су там прилучени (шицки зме прилучени на основну индустрию капитализма – воєну), тиж витворюю профит, без огляду хто достава, а хто траци войну. И, цо война длужей тирва, то капиталзму лєпше.
То видзиме у терашнїм чаше: ЗАД (фашистична держава) почал бомбардовац Иран (други раз за осем мешаци), Иран (теократска держава) врацел так же блокирал Гормошски морйоуз, прейґ хторого ше витворює пиятина шветовей тарґовини з нафту и зоз нафтовима продуктами.
Трамп треци тидзень войни, пре пороснуце цени нафти на вецей як 100 долари за барел, знїма санкциї Русиї, (фашистична держава) и дошлєбодзує тарґовину русийскей нафти. О дзень, Трамп Ирану зоз хторим є тераз у войни, знїма санкциї на тарґовину з нафту (чийо санкционованє почало ище 1996. року). Владимир Зеленски, предсидатель ище єдней фашистичней держави, понука ЗАД нови технолоґиї – дрони за одбрану од иранских дронох, хтори Трамп одбива.
Можеме предпоставиц же стари, америцки картел воєней индустриї нє жада же би бул вихабени зоз роботи зоз америцку державу, пре там якихшик „скороєвичох” зоз України. Источашнє, вельки империї (ЗАД, Русия и Техеран) нє интересує анї українска буржоазия, а ище менєй залївски квази-монархиї, хтори лєм бензински пумпи ЗАД. Буржоазия шицких тих державох порушує тоти шалєни поцаги, бо од нїх сама нє настрада. Так же, буржоазия у войни, алє прейґ целох роботнїцкей класи, жада прежиц, витвориц профит, а то може поробиц лєм прейґ шалєних, капиталистичних одношеньох.
Коло 150 дзивчата у основней иранскей школи нє прежили. У Палестини забити 21283 дзеци. У України вецей як 3200 дзеци забити, або остали инвалиди. А профит жиє.