ДЮРДЬОВ – У 18. колу Подручней фодбалскей лиґи Нови Сад, хторе одбавене 24. марца у Сириґу, фодбалере ФК Бачка 1923 зоз Дюрдьова страцели у стретнуцу зоз фодбалерами Сириґа, зоз резултатом 5:1.
Стретнуце домашня екипа, хтора другопласована на таблїчки, вельо шмелше и схопнєйше започала. Перши ґол на стретнуцу посцигли уж у 5. минути, а нєодлуга, у 13. минути, и други. Дюрдьовчанє ше намагали же би лєпше бавели и же би подле щесце обрацели на свой хасен, алє то им ше нє удало. По конєц першого полчасу прияли ище два ґоли, у 22. минути и у першей минути предлуженьох.
У другим полчаше фодбалере Сириґу бавели ище лєпше и удало им ше посцигнуц свой пияти ґол такой на початку, у 48. минути. Теди ше уз могол нагаднуц побиднїк того стретнуца, алє ше чекало конєц. Но, Дюрдьовчаном ше поспишело зменшац розлику у 58. минути, кед Милан Роґич схопно копнул до лабди, хтора закончела у процивнїцким ґолу.
Вельке число жовтих картонох на стретнуцу, по три за обидва екипи, указую же на терену нє було спортского справованя.
После того кола Бачка ище вше на шестим месце на таблїчки зоз 24 бодами. У шлїдуюцим колу дюрдьовски фодбалере на домашнїм терену привитаю фодбалерох зоз Петроварадину.