ДЮРДЬОВ – У Грекокатолїцкей церкви Рождества Пресвятей Богородици у Дюрдьове, вчера, 22. юния после Вечурнї отримана святочносц з нагоди Дня славянских просвитительох святих апостолох Кирила и Мефтодия.
Присутних привитал домашнї священїк о. Михаил Холошняй зоз пригоднима словами.
У святочней програми участвовали два церковни хори и єдна шпивацка ґрупа зоз Дюрдьова. Духовни шпиванки шпивали Дзивоцка шпивацка ґрупа зоз Културно-умeтнїцкого дружтва Тарас Шевченко, Шпивацка клиросна ґрупа Сербскей православней церкви Святого Вознесеня Господнього и Церковни хор Розанов грекокатолїцкей церкви Рождества Пресвятей Богородици.
О апостолох Кирилови и Мефтодийови и їх значеню за церковнославянску писменосц бешедовал проф. др Михайло Фейса зоз Коцура.
По законченю програми, у парохиялним доме була закуска дзе присутних привитала предсидателька Церковного одбору грекокатолїцкей церкви Рождества Пресвятей Богородици Любица Отич и з тей нагоди подзековала шицким учашнїком на програми, а подзековал и о. Холошняй.
На програми були присутни грекокатолїцки и православни парохиянє, як и православни священїк дюрдьовскей Православней церкви Святого Вознесеня Господнього о. Александар Симетич.
