РУСКИ КЕРЕСТУР – Националне швето, Дзень Руснацох – 17. януар, у Руским Керестуре означене и у двох образовних установох – у дзецинскей заградки „Цицибан” и Основней и штреднєй школи з Домом школярох „Петро Кузмякˮ.
У Дзецинскей заградки, дзеци зоз двох ґрупох, младшей и штреднєй обданїщовей, приповедали о бавискох з хторима ше дзеци дакеди бавели и поровновали их з нєшкайшима, а прейґ малюнкох ше им приблїжело випатрунок рускей застави.
Старшей обданїщовей и пририхтуюцей предшколскей ґрупи, приказани крадки видео-запис зоз цикавима фотоґрафиями Руснацох и Руского Керестура, та им ше прейґ нїх приблїжело обичаї и народне облєчиво, стари ремесла як и историйни податки значни за Руснацох, а присподобени дзецинскому возросту.
Як и каждого року, змисти обдумали їх воспитачки – Ксения Вучкович, Мария Дюрчиянски, Блаженка Мецек, Ясминка Чапко, Оленка Русковски, Даниєла Сопка, Наташа Настасич и Наташа Варґа.
