РУСКИ КЕРЕСТУР – Националне швето Руснацох у Сербиї – 17. януар, вчера означели наймладши Керестурци у Предшколскей установи „Бамби” тє. у його дзецинскей заградки „Цицибан” у Руским Керестуре.
У пейсц од седем воспитних ґрупох дзеци возросту од трох по шейсц роки, зоз своїма виховательками означели тот важни историйни датум за нашу руску заєднїцу. Прикладно ґу возросту виховательки Ксения Вучкович, Блаженка Мецек, Ясминка Чапко, Оленка Русковски, Даниєла Семан, Наташа Настасич и Наташа Варґа обдумали пригодни змисти на тоту тему.
Бешедовали з дзецми о приселєню, стародавних обичайох, облєканю, предметох, шпиванкох, о бавеню, о националних символох. Шицко було дочароване и зоз стародавнима предметами котри поскладани у учальнї, а дацо з того и нарисоване лєбо намальоване, як тиж и руски национални символи, герб и застава.
