КОЦУР – У Основней школи Братство єдинство у Коцуре школяре означели Дзень целових маїцох – Медзинародни дзень борби процив парняцкого насилства.
Того дня Школярски парламент поволал шицких школярох же би тот дзень препровадзели у розгварки и превенциї парняцкого насилства.
З нагоди означованя Дня целових маїцох, у коцурскей Основней школи орґанизовани активносци котри облапяли розгварки о тим яка потримовка значна, а яке красне слово моцне.
Школяре того дня пришли до школи облєчени у целових маїцох, а направели и прикрашели пано у школским конґу котри бул виполнєти зоз пригоднима порученями.
