12. ЮНИЙ – На нєшкайши дзень отримани I Шветови конґрес Русинох/Руснацох/Лемкох.
1849 – З бомбардованьом з дзелох Мадяре скоро цалком знїщели Нови Сад, згорели коло 2 тисячи хижи, а после нападу, од 20 тисячи жительох у городзе остали 6 тисячи особи. Напад ушлїдзел прето же горватски бан Єлачич, хтори як австрийни официр мал задаток загартушиц мадярску револуцию.
1915 – Народзел ше Дейвид Рокфелер (Нюйорк, 12. юний 1915 – 20. марец 2017), америцки банкар и єден з найбогатших людзох на швеце.
1929 – Народзена Анелис Мари Франк, позната як Ана Франк (Франкфурт, 12. юний 1929 – Берґен, марец 1945), док ше скривала од нацистох написала Дньовнїк Ани Франк, хтори постал символ страданя Єврейох у Другей шветовей войни.
1991 – У Медзилаборцох у Словацкей отримани I Шветови конґрес Русинох/Руснацох/Лемкох (World Congress of Rusyns), то дружтвена орґанизация реґистрована у Словацкей а котру творя орґанизациї Русинох, Руснацох, Лемкох з матичних русинских (карпатских) обласцох зоз України, Словацкей, Польскей, Мадярскей, Румуниї, як и орґанизациї зоз Сербиї, Горватскей, Ческей, ЗАД и Канади. Шветови конґрес РРЛ зашеда кажди два роки, вше у другей держави, а творя го делеґати орґанизацийох членїцох конґреса и делeґати Шветового форума младих. Шветова рада Русинох (анґ. World Council of Rusyns) то вивершни орґан Шветового конґреса РРЛ. Вона у медзиконґресним периодзе представя и заступа Конґрес и унапрямує роботу орґанизацийох – членїцох Конґреса на витворйованю догваркох и других документох принєшених на конґресу и у роботи конґресних комисийох под час конґреса.
2009 – Преглашени Дзень Русинох Словацкей. Дзень преглашени 12. юния 2009. року на Шветовим конґресу Руснацох/Русинох/Лемкох.
Нєшка Медзинародни дзень борби процив роботи дзецох (World Day Against Child Labour), установела го Ґенерална скупштина Зєдинєних нацийох, а Медзинародна орґанизация роботи го першираз означела 2002. року.